文、圖：說書人StoryTaler (facebook.com/storytaler.hk/)
編按：我們有心事的時候，總希望身邊有人願意聆聽和理解。說書人StoryTaler是一群致力在社區推廣精神健康的人士，當中有曾經患上精神病的朋友，還有修讀心理學的朋友；他們希望透過故事，消除歧視、標籤和誤解。怎樣才算懂得聆聽？請參考他們親自編撰的資源。
研究顯示，人聽嘢嘅效率只有25%左右，真係「左耳入，右耳出」。「聽」(hear) 同「聆聽」(listen) 係兩回事：「聽」只係一種對聲音嘅感官認知，而「聆聽」係留意到語言背後嘅意思、感受。從小到大，老師只會教小朋友去說話去表達，但從來無人教我哋點做一個好嘅聆聽者 。
1. 靜觀：啟動聆聽模式
你需要平靜落黎，覺察自己嘅感覺，提醒自己聆聽嘅注意事項，溫柔咁關掉平時用開嘅「解決問題模式」同「自動模式」*，進入「聆聽模式」。你需要有覺察力去留意言語背後嘅意思，觀察自己同對方嘅回應，覺察自己有冇好好運用聆聽技巧。
只有你平靜落黎，靜觀覺察當下一刻，知道自己做緊咩，以下嘅方法先可以發揮效用。
| *<自動駕駛>
研究表示，人有約46.9%清醒的時間，腦袋想的與正在做的是沒有關係的。當我們刷牙洗臉時，我們可能在想今天的早午晚餐吃甚麼，吃飯時在想怎樣寫paper，寫paper時又在反覆痛罵自己為何當初的時間管理那麼差勁…… 我們的腦袋雖然有能力讓我們在不假思索的情況下執行每天的任務，但是，在這個模式下，我們可能會不清楚自己在做甚麼，或正在朝著哪個方向走，重複著每一天，又或隨波逐流，盲中中過日子。 假如我們可以活在當下，過著有方向有價值的人生，通過不斷地提問自己正在做甚麼，我們會更意識到當下發生的事，並把自己從「自動駕駛」模式裏釋放出來，自主地選擇自己的道路。 |
請繼續用靜觀嘅心慢慢閱讀
2. 心在當下
聽人講嘢，切忌撳手機兼左顧右盼，將個心放喺面前同你傾計嘅人身上。你可以用身體語言表達你係聆聽緊，例如係暫停手上嘅工作、望住對方、頭同身都向住對方，比對方感受到你係陪緊佢。
「我响度，你想講嘅我會聽。」
如果無辦法暫停手上嘅工作，你可以時不時望下對方，暗示你係留心聽緊。有時可能好攰、或者有啲動作你做唔到，雖然身體語言有啲唔同，但你仍然可以清楚表明俾對方知道，你係聽緊嘅。
3. 有耐性
「聆聽模式」唔係好似平時咁慣咗咩都要俾反應，你可以停一停、等一等，俾啲耐性等對方講哂先，大家靜咗都唔緊要。太早打斷對方，會令對方無心機講落去，要明白「表達感受」本身係一件好具挑戰性嘅事，所以你需要耐性，比空間對方去抒發：
「我會陪住你，聽你講。」
見到對方咁苦惱，我哋可能會不知不覺心急咗，無形中畀咗壓力對方。當你覺察到自己心急，可以輕輕咁提醒自己慢落黎，俾足夠空間對方繼續 。
4. 忌急於俾意見
我哋都會本能咁俾意見，就好似平時工作咁，有問題就解決，「你快D做完D野咪無咁大壓力囉」，「你揾返人，人地就會揾返你架啦」。可惜「解決問題模式」會弄巧反拙，令對方覺得你唔明佢。你可以用一D說話去表示你係聆聽緊，鼓勵對方繼續講：
「嗯嗯……係呀，嗰個人點講呀？」
「嘩……咁恐怖？」
當對方表達完感受，而你又覺得對方想聽意見，你就可以睇下有咩幫到手：
「你依家覺得點？會唔會想我地一齊諗下點做好？」
5. 設身處地
從對方嘅角度出發，幻想下你就係佢。感受下如果自己有呢D經歷會點諗同有咩感受。你唔係聽緊佢講嘢咁簡單，「著對方對鞋」行下對方行過嘅路，然後你會發現對方有呢D感受都係可以理解嘅：
「你老細咁對你，我都明點解你會咁唔鍾意返工。」
「都係嘅，你之前嘅同事咁唔友善，你依家會驚同事都好明嘅。」
要留意噃，肯定對方嘅感受唔等於講大話或者係同意佢，你只係肯定呢啲感受係真實咁存在嘅。
6. 放下批判心
責怪或評論對方嘅感受，係最快令對方唔再同你講嘢：
「你呻都無用架啦，處理件事喇！」
「你太大反應！」
「咁小事……」
我哋好慣性會帶住自己嘅想法去聽對方講嘢，當對方嘅想法同自己嘅價值觀有出入，批判嘅聲音就會喺心中自動響起，甚至會忍唔住同對方爭論。如果你覺察到自己責怪或評論咗對方，你可以sa個lum，然後繼續嘗試去了解對方：
「對唔住呀，我頭先都係從自己角度出發，你可唔可以再講多D俾我聽，等我明白你多D呀？」
要打破慣性係唔容易，如果你留意到自己批判心起，可以溫柔咁同自己講：
「大家嘅經歷唔同，唔同人有唔同嘅睇法都好自然嘅。」
「咁樣諗對我黎講有D怪，不過都可以再耐心聽吓。」
「我未係好明點解有人會咁諗，但我都可以嘗試了解吓。」
7. 複述對方感受
你可以時不時複述對方嘅感受，用自己嘅文字概括對方講嘅嘢 (paraphrase)，對方會感覺到你係聆聽緊：
「你好掹掙，唔明點解腦細咁對你。」
「好無助，想揾人幫但又驚無人明。」
「我唔知我有冇理解錯，你覺得好hurt係因為你朋友無出聲維護你。」
「聆聽模式」係以對方嘅感受行先，感同身受嘅同時，將呢D感受話返俾對方聽，等佢知道你想同佢分擔。就算對方話你同佢感受到嘅嘢唔一樣，都唔緊要，只要抱開放嘅心，繼續去聆聽對方嘅回應就可以。
8. 反覆練習
每次對話完，回想一下自己有冇啟動到「聆聽模式」，自己係點樣用法，對方嘅反應係點，自己回應嘅方式同平時有冇唔同，回想下有無一D對話仲係「自動模式」同「解決問題模式」而否定咗對方。
聆聽係要不斷反覆咁練習，係一生嘅學習，長期啟動「聆聽模式」。
以上內容由說書人StoryTaler允許轉載，特此鳴謝。
